"APURANA AKU, SIMBAH”

Dening Eva Fiddiana

Jare simbah,

Jawane Jawa uwis ilang

Ilang amarga wis ora disayang

Ora disayang banjur mblayang

Jare simbah,

Jawa saiki uwis seje

Wong wadon ilang wirange

Wong lanang ilang kaprawirane

Uga pasar ilang kumandange

Kuwi kabeh merga awake dhewe

Eee.. lha dala!!! Jaman anyar uwis ngawe-awe

Wong etan padha melu-melu ngulon

Kowe apa ora nduwe budhaya dhewe ta, le?

Lha kok malah kepingin dadi bocah kuwalon

Kuwalon amarga malih melu ngulon 

Budhaya kulon suwe-suwe ngetan

Ngetan terus ngasi wis tumekan

Yen wis tumekan banjur mangan

Wong etan dipangan nanging ora konangan

Lha sapa sing ngonangi?

Kabeh bae isih padha turu!

Lha turu kok ora tangi-tangi?

Kuwi amarga wis kebacut ora krungu

Ora krungu pitutur simbahmu

Sing wis ngendika awit dangu